Ua lua nei aso o faagasolo le tauvaga faavaomalo o fagotaga i ogasami loloto o Samoa lea e 30 aufagogota mai Niu Sila, Ausetalia, Amerika Samoa ma Samoa o loo tauva ai.
E le o tuumāmāina e le siamupini mulimuli o le tauvaga lenei mai Samoa le aufaifaiva o le vaafagota o le Second Chance e taitai ai le afioga Tuala Oli Ah Him, le toe faaauau o le faamoemoe i le puipuia lea o le siamupini o loo latou umia.
E mafua ona na uma loa le tauvaga o le 2019 ae le toe faia loa ni tauvaga i tausaga e tolu na sosoo ai ona o le faama’i Koviti-19.
O le tamaitai Palemia le afioga Fiame Naomi Mataafa na ia faapā le fana e amata tuua ai e vaa fagota le uafu i Matautu i Apia i le taeao o le Aso Gafua ina ua mae’a ona tatala e le Palemia le faamoemoe i le Aso Toonai.
O i’a tetele e pei o sa’ula, o wahoo, masimasi, o ulua, faapea ga’ogo lapopo’a, ma ‘asi’asi e masani ona maua i tauvaga nei a le aufagogota ma aufaifaiva i le tauvaga lenei i tausaga uma.
O le faaiuga o le aso muamua o le tauvaga, na tulaga muamua le vaa fagota o le Yellowfin e 136.6 points poo togi, tulaga 2 le vaafagota o le Second Chance le siamupini o le 2019 e 19.4 togi, tulaga 3 le vaa fagota o le Double Trouble e 18.05, tulaga fā o le vaafagota o le Last Minute e 11.7, tulaga 5 o le vaa fagota o le Pure Indulgence e 11.25 ma le 6 o le vaafagota o le Reel Cat e 8.35 points.
O togi uma nei sa fua i le mamafa o le aofaiga o i’a na maua e le vaafagota.
O i’a o le sa’u poo le marlin, masimasi, ma le wahoo sa faamauina o i’a pito lapopoa ia ma mamafa na fuaina i le mae’a o le aso muamua.
O le Aso Faraile e mae’a ai le tauvaga lenei o faigafaiva i ogasami loloto o Samoa lea ua 23 tausaga o faia pea.
