Ua pu’e faapagota nei e leoleo se alii 29 tausaga, ma ua molia i moliaga o le talepe fale ina ua faamaonia lona faaleagaina ai o le maota o le Minisita o le Va i Fafo, Vaovasamanaia Winston Peters.
I ripoti na faaalia na tata’e e lea ali’i 29 tausaga le faamalama ma na māua ai le nuti o le tioata o le faamalama o le fale a le minisita i Aukiulani nei.
Faamauina o lē ua molia o se tagata e auai i solo tete’e a i latou e faaalia a latou lagolago ia Palesitina – o se mataupu ma’ale’ale lava, ae na faatino i luma a’e lava o le fale a Vaovasamanaia Winston Peters le solotete’e ma o iina na faatino ai loa e lē ua molia le soligatulafono.
Na faaalia le lē fiafia o le Peters i le gaioiga ona o le saogalemu o lona aiga ma lana ta’ifau tulou. Na ia ta’ua foi o le aso lava lea na talimalo ai i nisi sa asia atu lona maota.
O se tulaga e na te lē talia lava ia ituaiga gaioiga.
E lei manofonofo foi nisi o sui o le palemene, e pei o David Seymour ma le ta’itai o le vaega faaupufai a le Leipa, Chris Hipkins e faaalia o la manatu i le lē tatau lava ona tula’i mai o nei amioga ma gaioiga.
O loo faailo foi tulaga o se tulafono e tapu ai ona toe fai ni solo tete’e i nofoaga ma itu o loo aumau ai tagata (residential areas) e pei foi ona faatino iai felafolafoa’iga a sui o le kapeneta.
Puna o Faamatalaga: https://www.rnz.co.nz/news/national/575175/man-arrested-after-window-smashed-at-winston-peters-home
