E 60 tausaga o se ali’i ua pue faapagota e leoleo i sa latou suesuega i Sini i le po anapo. Ta’ua i lipoti sa ia tafana solo tagata i le faaitu o Croydon Park; ma sa lapata’ia e leoleo tagata i lea faaitu ia nonofo i o latou fale ao agai leoleo i se fale i Georges River Road i le te’a o le itulā e fitu i le afiafi ananafi.
Fai mai na faaleagaina ai nisi o taavale faapea se taavale a leoleo i le faalavelave lea ma e toatasi se tagata o se ali’i, pe a ma le 50 tausaga na faanatinati ona avatu i le falemai i Canterbury mo togafitiga ona o manu’aga mai se fana. Lipotia e tigaina.
Faamauina e taunuu atu leoleo i le nofoaga o lea mataupu ae tafana ane e le tagata sa faatupuina le faalavelave, e faapea e to’atolu nisi o tagata na aafia ma e manua mitmiti, sa togafitia lava e le vaega o fesoasoani muamua o faalavelave tutupu faafuasei (paramedics)
E toa 16 tagata na togafitia i le po anapo mai lea lava faalavelave ae poo le afa o le 9 na pueina ai loa e leoleo le 60 tausaga e pei ona ta’ua, ave ai ma fana na maua i le nofoaga na iai, na avatu foi i le falemai mo togafitiga ma o loo iai pea i le taimi nei ao fa’aauau suesuega.
Puna o Faamatalaga: https://www.9news.com.au/national/croydon-park-shooting-sydney-police-operation-georges-river-road/1958dc79-a94d-4d31-a71a-82cafa8c4a4b
