Ua iu lava ina pueina e leoleo le tamaitai lea sa kukaina le taumafa na ave iai mushrooms lea e masalomia ai le maliliu o tagata e toatolu mai Vitoria i se taimi e lei mamao atu na aveina atu foi i talafou.
O le tamaitai o Erin Patterson 49 tausaga ua taofia i le vaaiga a leoleo ina ua aveesea mai lona fale i le faaitu o Gippsland i le Aso Tofi talu ai.
E lei faia se moliaga i le taimi nei e pei ona lipotia e le 9News ae sa faia se suesuega i lona fale i Gibson Street ma sa faaaogā ai taifau a leoleo ma masini mo suesuega faaonaponei.
O le faamatalaga lata mai a leoleo o le a suesueina le tamaitai lea ma o loo faaauau pea lava foi le suesuega i lenei mataupu.
O le aso 30 o Iulai na ave ai i le falemai tagata e toafā sa o latou taumamafa faatasi i se meaai sa aofia ai i se taumafataga na faia i le fale o lē ua pueina.
O i latou ua maliliu e toatolu e 66 tausaga o le isi ma le isi toalua e tai 70 tausaga le matutua.
O le isi e atoa iai le toafā o se faafeagaiga faatoa tea i tua mai le falemai sa togafitia ai mo se taimi umi talu mai lea mataupu.
I le taimi ua tuanai sa faaauau pea ona teena e Patterson se mea sese na ia faia ma e lei faia lava iai se moliaga.
