E 13 ma le 14 tausaga le matutua o tamaiti na pueina e leoleo i le mae’a o le gaoia o nisi o nofoaga i Aukilani i le taeao analeila e faaaoga ai foi se taavale i faiga ua taatele i le taimi nei.
O le pamu penisini i luga o Manukau Rd na osofaia i le lata i le 3 i le vaveao ma ua feta’ua’ina e leoleo, o i latou na faatino lea osofaiga na sosola ese i le isi taavale na vaaia o sosola ese mai i se isi foi gaoiga i se faleoloa i King St i Pukekohe.
Fai mai na faaaoga foi se taavale e osofaia ai ma ulufale i lea nofoaga.
Na fesoasoani le vaalele helicopter a leoleo i le sailia o le taavale ma faaaoga ai sipaika a leoleo e taofia ai le taavale i Manurewa.
O le toalua sa i totonu o le taavale e 13 ma le 14 tausaga le matutua ma ua pue nei e leoleo.
O loo suesueina foi e leoleo nisi faalavelave o le gaoi lava i se faleoloa i Takanini atoa ai ma le isi foi faleoloa i Alfred St i Aukilani tutotonu.
