Ua alia’e popolega i le vaiaso nei i nisi e aumau i le faaitu i Timaru e lata ane i le nofoaga sa faamautu ai le kegi a le Devils Henchman lea ua agai atu iai le kegi a le Rebels.
Na lipotia mai o leoleo faaupegaina na o latou poloka Meadows Rd i Washdyke ona o lipoti sa faalogoina le pā pā ane o fana.
Na faamaonia mai e leoleo ia faalavelave na tulai mai ae foliga e leai se tasi na molia ai i lea faalavelave.
E molimau nisi e faigaluega ma aumau i le faaitu lea e faapea o lenei lava vaiaso ua vaaia ai le toatele o leoleo i le latou faaitu talu mai le Aso Gafua ma ua tai 30 minute ma vaaia le faia o petolo a leoleo.
Fai mai tagata ia e matuai le manaomia le tulaga e pei ona vaaia i le faapipii solo o faailo ma fu’a a le kegi a le Rebels ma e manatu o le a tulai mai ai foi ni tulaga lē lelei.
O molimau a nisi mai lea lava faaitu e faapea ua leva ona aumau i le faaitu lea e lei iai lava ni faafitauli na feagai ma latou i le kegi a le Devils Henchmen peitai o le oo atu a le Rebels e foliga e ese le tulaga o le a iai.
Fai mai le pulenuu o Timaru, Nigel Bowen i le lipoti e tasi lava le feau o loo tuuina i kegi nei, e le taliaina i latou i lea faaitu.
