A o fai mai ai le malo ua aveesea uma sā o le Koviti a Niu Sila, e le o nofonofo lelei ai le iuni.
O le aso ananafi lea na amata aloaia mai ai le suiga lenei mai le fonotaga a le Kapeneta i le afiafi o le Aso Gafua lea ua lē toe moomia ai se faanofoesea faapea le faia o ufi fofoga, peitai fai mai le Unite Union o se faaiuga o lona uiga o le a fosi ai lava le alu o le isi tagata galue e faigaluega a o la e ma’i ona o le leai o ni aso ma’i.
Faaalia ai foi e le tamaitai suesue faapitoa Dr Siouxsie Wiles lona faanoanoa tele i le faaiuga a le malo ona o le popolega o se faaiuga e toe tigaina ai lava le atunuu.
O le suiga ua iai nei e le gata ua suitalaga le faamalosia o le faanofoesea i taiala a le soifua maloloina ae o le a faaaogā foi aso ma’i lea e na o le 10 e agavaa ai i le tausaga, pe a maua i le Koviti.
O loo tutusa finagalo faaalia o Wiles ma le iuni, i le popolega mo tagata faigaluega.
Fai mai ai ma le iuni, afai o lea e malosi le fulu, mama’i tamaiti, toe faamoemoe i aso ma’i i taimi e maua ai le Koviti, e foliga mai ai ua lē o toe lava le 10 aso ma’i i le tausaga.
