O le peripheal arterial disease, o se gasegase fai mai e amata mai i le faaputu o ga’o i le tino ma iu ai ina poloka ai ma alatoto.

O le tulaga lea ua faailoa mai i se tusitusiga i le 9News i le aso fai mai na iu ina aveesea ai le vae se’i tulou o se tasi tina mai Sini ina ua fiu e togafiti ae ua faaauau pea ona faatupulaia le faaletonu.

Fai mai o le peripheral arterial disease e toatele e lei faalogo iai muamua ae e taatele ma ua faaauau pea ona aafia ai tagata.

Pe ā ma le 15 pasene o tagata Ausetalia o loo aafia ai ma e ono lamatia ai le soifua o le tagata i gasegase e pei o le stoke ma le faaletonu i le fatu. 

O le molimau a le tina ua aafia lona aao, sa amata lava i le faalogoina o le tiga i le vaega pito i lalo o ona vae, sa lei manatu mamafa iai peitai i se taimi mulimuli ane ua oo ai ia i se tulaga e lei mafaufauina.

Fai mai fomai o le ituaiga gasegase lea afai e le faia iai se togafitiga e oo ina oo ai i se tulaga e pei ona iai le tina lea.

Faailoa e fomai e lelei ona agai e fai se siaki pe a faalogoina ituaiga āuga ia e ono laveai mai ai e soifua ae aua le faatamala.