Ua faailoa e le Ofisa Sili o Pulega o le Matagluega o le Soifua Maloloina le Susuga Aiono Dr Alec Ekeroma e faapea i le taimi nei pe a ma le $2 miliona aitalafu a le Matagaluega, o tau o vai ma fualaau i Kamupani o loo latou auina maia mai fafo.

O le mafuaaga o lea tulaga o le faatuai lea ona faia o peimeni poo tupe totogi atu, ma i lona iloa e le o fuatasi i se matagaluega a le Malo lea tulaga.

O lona malamalamaga foi lea a o iai i le Iunivesite Aoao o Samoa e tele lava ina tuua tupe totogi atu pe a ma le 3 masina, 6 masina pe 12 foi masina ma e tele lava mafuaaga eseese e ala ai ona tuai.

Na ia ta’ua foi o nisi o ia mafuaaga e aofia ai le totogi atu i kamupani nei le tau pe a ma le $200,000 mo vai ma fualaau i le masina lenei, ae toe faia lava foi se isi oka o vai ma fualaau e faaalu ai le $200,000. E foliga mai e pei e lei totogiina atu lava se tupe.

Na ia faailoa foi o nisi lava kamupani o loo auina mai ai oloa nei e faaauau lava ona latou auina maia ia oloa e tusa lava pe ua au atu i le $500,000 le tupe o loo nofo aitalafu ai tatou, peitai o nisi kamupani e latou te le faatagaina lea tulaga.

Ua fesiligia Aiono ona ua māua sa iai i le lua vaiaso talu ai se tulaga utiuti o vai ma fualaau, o nisi lava ua le maua se vai o se ituaiga faapitoa mo le gasegase i le faletalavai. 

O lana tali sa tuuina mai o se tasi o mafuaaga o le utiuti lea o mea e gaosia ai vai ma fualaau o loo maua i atunuu o loo iai kamupani latou te gaosia e pei o Niu Sila ma Ausetalia ma sa faamuamua ai e ia atunuu o latou lava tagata. 

Na ta’ua e Aiono o le tulaga lea e tatau ai ona aua ne’i gata ai i ia atunuu la tatou tilotilo mo oka nei ae ia vaai foi i atunuu e pei o Initia ma isi.

O le isi mafuaaga o le tuai mai o vaa oloa. O loo molimauina le utiuti ai o nisi o vai ma fualaau i faletalavai i le atunuu ona o tulaga nei e pei ona ta’ua.