E tugā manuaga o se tamaitai na ua pa’ū ese mai se taavale na tietie ai luga o le afi a o alu le taavale ma solia ai.

O lenei faalavelave na tupu i Magele o faagasolo ai fiafiaga a le autapuai ma le aulagolago ia latou ‘au o loo taaalo i le taamilosaga o le Ipu a le lalolagi o le lakapi liki o loo faagasolo i Peretania i le taimi nei.

I se lipoti mai le 1News o loo ta’ua ai, o le vaveao ananafi na lipotia ane ai lenei faalavelave i le taimi o loo vevela le faaaliga o solo a taavale sa tumutumu ai lea vaega o Aukilani a o feofeoai solo taavale ma faae’e a latou pu, ma alalaga leotetele tagata o loo faalealea solo fu’a a o latou atunuu, aemaise lava fu’a a Samoa ma Tonga.

O se taimi ua te’a le 1am i le vaveao na valaau ane ai le fesoasoani a le falemai mo faalavelave faafuasei, ma auina atu ai loa lea tamaitai i le falemai i Middlemore.

I se lipoti mai le Counties Manukau West Area Commander Inspector Matt Srhoj, na ia ta’ua ai o le tamaitai lea sa tietie i luga o le afi o le taavale o loo alu, ma na sesee ifo ma pa’ū ai i lalo ma oso ai luga le taavale lea.

E tigaina manuaga o lea mafine ae o loo lipotia mai le iai i se tulaga ua toe to’amalie. O loo faagasolo suesuega a leoleo i le faalavelave na tupu aemaise i le tagata na uliina le taavale.

I le tulai mai o lenei faalavelave, ua toe faaleo mai ai foi lapataiga a malu o le malo, ina ia tautuana le auala o loo faaali ai le fiafia i lenei taimi a o lagolago atu i taaloga a tamafanau o loo faagasolo, ina ia fiafia ma faaali le lagolago, ae ia faatino uma i ni gaioiga e lē solia ai le tulafono, ia tausisia ai le filemu aemaise foi ia atagia atu ai uiga faaaloalo ma amanaia le vafealoaloai ma isi tagata.

Na saunoa Srhoj, ‘o le latou lava popolega ina ne’i avea nei gaioiga lē magafagafa poo uiga solitulafono e ono tulai mai ai nisi faalavelave matautia ma afaina ai le soifua.’

“Ia e mitamita i lau tapuaiga ma lau lagolago – i au gaioiga saogalemu ma le faaaloalo.”

O le faaiuga o le vaiaso lenei o le a faagasolo ai Semi Finals o le taamilosaga lakapi liki e pei ona faagasolo ai i Peretania, lea o le a iloilo ai ‘au malolosi ua tulai mai lenei Ipu o le lalolagi, i le va o Niu Sila ma Ausetalia i le 8.45am i le taeao o le Aso Toonai, ae taaalo Egelani ma le Toa Samoa i le 3.30am i le vaveao o le Aso Sa.