O masina o Mati ma Aperila e lei suia ai le tau o suauu ma penisini i Samoa, ae o lea ua isi se suiga i le tau o ia oloa manaomia mo le masina fou lenei o Me.
O le penisini e tasi le sene ua sii ai le tau lea sa 3 tala 20 sene i le lita i a Mati ma Aperila ae ua 3 tala 27 sene nei i le lita mo lenei masina fou.
O suauu o le kisi ma le kalasini ua faaitiitia tau lea ua 3 tala 30 sene i le lita le kiso faatusa i le tau sa iai i le lua masina ua mavae e 3 tala 56 sene i le lita, ma le kalasini sa 3 tala 20 sene i le lita ua alu ifo nei i lalo i le 2 tala 93 sene i le lita.
Ua faaalia e le sui Minisita o Tupe le afioga i le tamaitai Palemia, Fiame Naomi Mataafa i se pepa o faamatalaga ua faailoa ai tau fou o ia oloa, o atugaluga i le faavaivaia o le tamaoaiga o le lalolagi o loo ua aafia ai le tau o le suauu kiso ma le kalasini.
Ua faaalia foi e le sui minisita o tupe o faasalalauga a le faalapotopotoga o atunuu o loo gaosia ma tufatufaina le suauu i le lalolagi le OPEC, e faatatau i le faaitiitia o le aofaiga o le suauu gaosia, ma ua faaopoopoina atu lea i popolega, ma o le a avea ma tulaga e ono toe siisii maualuga ai le tau o le suauu.
