O le taeao analeila lea na tatalaina ai se tasi o auala i Vailoa Palauli.
O le Minisita o Fela’uaiga ma Atina’e Eseese, Afioga Olo Fiti Afoa Vaai na ia saunoa ai i fuafuaga nei o galuega tetele a le Malo auā le manuia o afioaga e le gata i Upolu ae o le motu i Salafai.
“O lenei galuega sa fausia ma mulimulitai i faiga faavae ma aiaiga o galuega faatino o auala tetele a le Malo.
“O lenei auala sa faatauofoina faalauaitele e le Malo lenei galuega i le masina o Ianuari 2023 mo le sailia lea o se konokarate poo se kamupani e faatinoina.
“I le mae’a ai o iloiloga a le komiti sa tuuina mai ai le fautuaga e tuuina atu lenei galuega i le kamupani a le Apia Lua i le tau $567,032.25 ina ua faamalieina uma vaega sa tuuina mai i le tauofoga.”
O le aso 20 o Ianuari o le tausaga nei seia oo i le aso 20 o Aokuso o le taimi faatulagaina lea o le fausia o le galuega.
“Peitai o lea ua silasila atu ua mae’a le galuega i le taimi faatulagaina, o le auala e 1.7 kilomita le umi ae 1 kilomita na faatā.”
Na toe faamanatu ai e le Minisita i le afioaga le vaaia lelei o nei galuega o loo fesoasoani mai ai le Malo.
“Pau le talosaga a le malo tatou galulue faatasi i le tausiga o le tatou auala.
“Tele atina’e i nisi o alalafaga e lē natia le tele o tupe a le malo ua faaalu e fai ai auala i tulaga mautu ae tulou o le upu e to ia te au, e sau lava i le isi pito e tau i le isi pito e leai se galuega o faia ai e o tatou nuu.”
O lenei galuega o loo faatupeina i lalo o vaega tupe ua faaagaga mo galuega tetele a le Malo.
