Ua maua pea e le au fai taavale i lo tatou atunuu faapea auaunaga ma tautua e moomia ai oloa tau suauu ma penisini le faamāmā avega i tau o ia oloa mo lenei masina fou, ina ua faaitiitia ai pea o latou tau.
Sa 3 tala 16 sene le penisinisi ia Iulai ae o lea ua 3 tala 9 sene i le lita mo Aokuso, o le suauu kiso sa 3 tala 16 sene foi i le lita ia Iulai ae ua palasi nei i le 3 tala 10 sene i le lita, ma le karasini o lona tau fou ua 2 tala 71 sene i le lita pe a faatusa i le 2 tala 79 sene i le lita sa iai i le masina na tea nei.
Ua faailoa i se pepa o faamatalaga mai le ofisa o le Minisita o Tupe, ua amata ona toe lelei le faataotoga o tau o nei oloa, o le mafuaaga lea o le pa’ū o le tau ua iai nei.
