O le pa’ū laititi i lalo o le numera o fanau ua maua i āuga o le flu le influenza B, na mafua ai ona faia le faaiuga e toe amata a’oga i le vaiaso nei.
O le finagalo lea o le Minisita o Aoga Taaloga ma Aganuu le afioga Seuula Ioane ina ua tāpā sona finagalo ma fesiligia ai i tapenaga mo puipuiga o fanau, ona e tele a’oga i le lio o le taulaga ua molimauina e le o usitaia le fautuaga e fai puni fofoga poo mask.
Na faaalia e le Minisita ua ave le faatuatuaga i mātua ma faiaoga e faatino ai auala o puipuiga auā o le itu tāua, o le saogalemu o fanau mai le aafia i le flu.
O le lipoti lata mai a le soifua maloloina mo aso e fitu mai le aso 24 o Aperila e oo i le aso 30 o le masina na tea nei, e 19 gasegase tigaina na faamauina ai, o i latou ia ua malosi le tale, ma le fiva.
E fua lea aofaiga i faamaumauga o le aso 23 o Aperila e 34 gasegase tigaina o le flu o lona uiga ua faaitiitia.
O le lipoti foi lea ua faailoa ai e ono gasegase fou o le Koviti-19 na faamauina i le masina o Aperila.
O loo faatino pea su’ega mo le atunuu e autovaa i le maota gasegase i Motootua lea o loo faatino e le au faigaluega i le vaega o le falemai mo oloa poo nifo.
