Fai mai e fai si to’atele o i latou ua fasiotia mai fetauiga i le po anapo i vesiga i le tuaoi o Pakistan ma Afghanistan.
Ua lipotia e le CNN o vesiga aupito ogaoga ia ua tula’i mai i le va o atunuu e lua talu ona toe tula’i mai le Taliban i Kabul.
O le faamatalaga mai le militeli a Pakistan ua ta’ua ai e to’a 23 ana fitafita na fasiotia ai ae ua ta’ua e le Taliban e to’a 9 a latou fitafita ua maliliu mai ia vesiga.
Lipotia na māfua le vevesi ina ua faailoa atu e Islamabad i le Taliban ua tatau ona fai sana gaioiga i tagata poo ni vaegā’au foi ua osofa’ia ane Pakistan.
Fai mai Islamabad o ia osofa’iga e faia ane mai Afghanistan peita’i o loo tetee iai le Taliban.
O le Aso Tofi la na te’a nei ua feta’ua’ina na osofa’ia ai loa e Pakistan le faaitu o Kabul i Afghanistan ma amata ai loa ma le vevesi, faifaitetele i le po anapo ma faailoa mai ai le au maliliu i le taeao analeila.
Faailoa e Afghanistan ua taofia a latou osofa’iga i le taimi nei ona o talosaga mai Qatar ma Saudi Arabia ma ua tapunia foi ma tuaoi o ia atunuu a o talitali ai le isi laasaga o le a iai.
Puna o Faamatalaga: https://edition.cnn.com/2025/10/11/asia/firefights-pakistan-afghanistan-border-intl-hnk
