E ui i le malosi o Gabrielle ma le tele o suiga, e oo mai i le taeao nei e le o iai se isi ua faamanualia pe ma’umau foi se soifua.
I se ripoti lata mai ma le tulaga ua iai North Island, e faitau afe fale o aiga ua motusia eletise, tele auala tapuni, taofia le tele o faigamalaga a vaalele, atoa ai ma le tele o aoga ua le a’e.
O le suiga lata mai i le taeao nei o le toe tatala ai o le auala laupapa a le Harbour Bridge lea na muai sau tala anapo e ono tapunia mo le aso atoa, ma e ui ua toe tatala ae fai mai le Auckland Transport o loo tatala faatasi ai ma aiaiga.
O le afā o Gabrielle o lea ua i Matu i Sasae o Niu Sila, ma e silia ma le 11 mita le maualuluga o galu na ripotia mai le Bay of Islands.
E oo mai i le taimi o tala fou ua silia ma le 29,000 fale o aiga ua leai se eletise ma e ono faaopoopo lea fuainumera a o tālia ai pea le malosi o Gabrielle i le po ananei faasolo atu a taeao.
I aiga Aukilani lava ia na o ia, e tusa ai o le lipoti mai le Vector i le taeao nei, e tusa ma le 15,000 ua leai se eletise.
O se po pisi tele na iai le vaega a le tinei mu anapo, e pei ona tali atu ai i le silia ma le 180 valaau mai aiga e le gata i laau toulu, o poumoli toulu faapea le tele o meatotino na ave e le matagi.
Ae mo aiga ua faaleagaina fale, o lea na amata tatala mai anapo nofoaga lē tumau e mafai ona sulu iai tagata ua faaleagaina fale ae e lē o iai foi ni o latou tauaiga e mafai ona agai iai.
O trains foi i Aukilani i le agai atu i Britomart ma le toe o ese mai, o lea na amata taofia mai le itula e 8 anapo ma e faaauau ai i le asō.
I se lipoti mai le kamupani a le Ea Niu Sila ma faigamalaga a vaalele, o lea ua faaleaogaina uma le tele o faigamalaga faavaomalo i le asō faapea le faasolo atu a taeao.
O faigamalaga nei o le asō o loo lavea atu ai ma malaga i le va o Niu Sila ma le Pasefika, ma i se tala lata mai mai le kamupani o se suiga ua faia mo le saogalemu o le aufaigaluega, tagata feoai faapea ai ma ana vaalele.
O le isi suiga mo Aukilani mo le asō faapea a taeao, mo aiga uma sa masani ona aoina a latou lapisi i aso nei, o lea ua lē aoina le lapisi i le asō faapea a taeao ma e faatoa toe amata faasolo mai le Aso Lulu.
O loo tumau pea lapataiga o timuga mamafa ma savili malolosi mo Aukilani, lea ua iai i lalo o le lanu mumu seia oo atu i le taeao a taeao, e faapea foi Coromandel ma Northland.
O le fautuaga o loo tuuina mai o le faigaluega mai le fale i le asō pe a mafai, ma aua le soona feoai seia vagana ai o se feau tatau.
