Ua pueina se tamaitai i le mae’a o le osofaia o le ofisa o le Palemia Jacinda Ardern i Aukilani i le taeao analeila.

Ua lipotia i le One News o le faitotoa o le ofisa lea i Mt Albert i New North Rd na faaleagaina.

Na pueina e leoleo le tamaitai e 57 tausaga mai se fale i Coatesville ae leai se isi tagata o sailia e leoleo.

Na ta’ua e se sooupu a leoleo na maua lipoti e faatatau i le faaleagaina o le ofisa poo le tea o le valu i le taeao analeila ma ta’ua ai le togi ane o se aitema i faamalama.

E lei iai nisi na faamanualia ai ona e lei iai nisi i le ofisa i lea taimi.

Ua faia nei suesuega i lea nofoaga ae ua faamatala e se tagata faigaluega mai le isi pisinisi e lalata ane e faapea na o latou faalogoina se pa’ō leotele i le tea o le valu.

E le mailoa le mafuaaga o lenei mataupu a o tālia ai se faamatalaga mai le Palemia e tusa o le tulaga ua tulai mai.