E iai se faiga faaonaponei faatekonolosi ua faaaogā i le toe uaeaina o se tasi auala pisi i Sini ma ua faamoemoe o le a faasaogalemuina ai lea vaega o le alatele mo avetaavale e uia.
Fai mai le Alaata 9 sa galulue le aufaigaluega i le faaleleia o le Western Distributor, o se tasi o auala pisi i le aai lea e fesoota’i ai i le itu i Sisifo o le alalaupapa tele i Sini, le Sydney Harbour Bridge.
O meapu’eata fou o le a faaaogā ai ia faiga faatekonolosi o le a ta’uina ai i tagata o faatonutonuina feoa’iga i auala, traffic controllers, poo fea tonu vaega o auala o loo tupu ai se faalavelave ma i ni nai sekone e mafai ona o latou faailo ai lea faalavelave i avetaavale o loo lalata atu pe o loo i le nofoaga foi o loo tupu ai sea faalavelave.
Ua ta’ua foi o le toe faiga ua iai nei o lona uiga o le a vave ai foi feoa’iga a taavale e mana’omia mo se fesoasoani i se faalavelave ma o le faiga lava foi lea e tasi o loo faaaogā i le auala o le M4 i Sini lava.
O ia ituaiga faailo e faaaogā i lea faiga fou e mafai ona taofia ai ni faalavelave tetele e ono tula’i mai auā o le a vave ona faailo atu i isi magaala ma avetaavale ia faamamao ese mai se nofoaga o loo tupu ai se faalavelave.
Fai mai le minisita o auala i Sini, John Graham o auala faapea lea e faaigoa o smart roads e ono faaitiitia ai le aofa’i o tagata maliliu i luga o le alatele.
Puna o Faamatalaga: https://www.9news.com.au/national/new-south-wales-news-smart-motorways-to-alert-drivers-of-crash-traffic-in-real-time/fa18961d-4da7-4f38-9c0a-f5517cc5df23
