E ono faasāina le toe faia o ni solo tetee i tafatafa ane o ni malumalu tapua’i i Vitoria i le mae’a o le osofa’iga i le malumalu o Addas Israel Synagogue i Melepone i le vaiaso talu ai.

Fai mai o loo iloilo nei e le faigamalo a lea setete pe ua alagātatau ona faasā tagata mai le faia o ni tetee i fafo ane o nofoaga tapua’i.

O le afi na sasao ane i se malumalu o le komiuniti o tagata Isaraelu i lea faaitu o loo faaauau pea iai su’esu’ega.

Fai mai le Palemia o Ausetalia i se faatalanoaga i luga o le televise, ua manino o faiga faatupu faalavelave o se tasi lea o taumafaiga ia faatupu le fefe i le komiuniti ma e faapea uma lava le osofa’iga lea ua faia i le malumalu tapua’i e pei ona ta’ua.

E ui la e lē o faamauina aloa’ia lea gaioiga o se faiga faatupu faalavelave i le taimi nei peitai ua faatalanoa i le asō lea mataupu e le vaega o feagai ma su’esu’ega faapea i le setete o Vitoria.

O le faai’uga o le vaiaso na folafola ai e le faigamalo a Ausetalia le $25miliona ua avanoa ane mo tulaga tau le puipuiga mo komiuniti ia o tagata Isaraelu ma o le a faaopoopo le isi $32.5 miliona o lea fesoasoani i totonu o le 18 masina o lumana’i.

O ananafi foi na folafola ai e le faigamalo a NSW o loo silasila foi i avanoa o le suia o le tulafono i le mataupu lava lea e tasi ina ua vaaia solo tetee a tagata sa faia i se tasi o malumalu tapua’i i Sini i le Aso Lulu na te’a nei.

Puna o Faamatalaga: https://www.abc.net.au/news/2024-12-09/melbourne-synagogue-fire-adass-israel-police-investigate/104700618