A o faagasolo ai pea galuega i le Pike River Mine i le vaiaso nei e ala i le eliina o nisi o vaega o le maina, ua faailoa mai i lipoti i le asō o nisi o ata aupito lata mai ua maua ane o loo iloa ai ni tulaga e foliga o ni vaega o tino maliliu o i latou na aafia i le faalavelave i lea nofoaga i le 2010 na maliliu ai le aufaigaluega e toa 29.
Fai mai ua savali i le tolu vaiaso o faatino pea le eliina o le nofoaga ma faia ai le suesuega a le au suesue faapitoa i mataupu faapea ma ua faailoa mai e leoleo e toalua fomai o tino maliliu ua o la iloiloina ata mai le galuega o loo faia nei ma o loo faaauau pea a la suesuega.
O le masina o Novema 2021 na muai mauaina ai vaega o tino maliliu o ē na aafia i le eliina o le nofoaga ma faaauau ai pea le sailiga.
Ua faailoa e leoleo o loo faailoa uma tulaga o suesuega faagasolo i aiga o nai alii faigaluega i le maina lea e talitonuina ua maliliu uma ai i le faalavelave ma o le masina o Ianuari o le tausaga nei na toe amata ai le eliina o nisi vaega o le maina ina ua toe tatala le suesuega.
O se tasi lenei o faalavelave tele sa tulituliloa e a tatou talafou i lea foi vaitaimi ina ua pa le maina ma tanumia ai le toa 29 o le aufaigaluega na faamauina ua maliliu uma ai.
