O lea ua omai i lalo ma le taualuga o le toese pagota o loo faasala i le toese mo tupulaga talavou i Hawkes Bay. E oo mai i le afiafi ananafi ua faavaivai le to’aono lea na momoe i luga o le taualuga o le toese e ui i le mālūlū o le po o le Aso Gafua.
O le ‘afa o le lua i le aoauli o le Aso Gafua na o ai i luga o le toese ma o lea to’aono e i le va o le 17 ma le 19 tausaga. I lipoti e faapea o le lē fiafia o nei talavou i le faasāsā o i latou mai le vaega o loo faia ai taaloga na mafua ai ona o i luga o le fale ma e iai vaega o le toese ua faaleagaina e aofia ai faamalama taei.
E ui i le malosi o le mālūlū na iai le po o le Aso Gafua faasolo mai ai i le taeao ananafi lea e faapea e 1 tikeri le malosi o le mālūlū, ae le’i faavaivai ai le faatautee a i latou nei.
Ua faafetaia ai ma le aufaigaluega o le toese i taumafaiga uma ia aumai filemu i lalo i latou na faatautee ma e leai se isi na faamanu’alia pe lamatia ai foi le saogalemu o tagata lautele.
Ua faia ai ma le iloiloga o lea mataupu ma o le a oo foi i leoleo.
