Ua oo i le $5 afe le aofa’i o ponesi ua ofoina e nisi fale’aiga i ni tagata faigaluega e fia galulue mo latou. A o faifai tetele pea le faafitauli o le lē lava o tagata faigaluega ua faailoa mai i le asō o se tasi o tagata faipisinisi ua ia ofoina le 5,000 lea o se ponesi pe afai e saini le tagata e faigaluega mo ia i ana fale’aiga ma o loo tele avanoa.
O le Sydney Restaurant Group lea latou te faagaioia le tele o fale’aiga aemaise lava i le aai i Sini ua faailoa e tatau ona oo atu i le taumafanafana ua faaluaina lana aufaigaluega o loo iai ina ia sologa lelei ai ma toe foi le auaunaga i le tulaga na iai.
Fai mai le pule o le kamupani lea o le lē lava o le aufaigaluega e mafua ai ona tapunia pisinisi, o se tulaga o loo taumafai e ‘alofia. O loo talotalo foi le alii pule talosia ia lifi ai foi ma le aofa’i o tagata e mafai ona faataga e malaga mai i Ausetalia e faigaluega ai ina ia maua ai se fesoasoani mo le mau avanoa faigaluega o loo matala.
