O le aso faavaomalo mo faiaoga e faamanatu i tausaga uma, o se avanoa e ave ai le faafetai ma le faamalo ia i latou o tautuaina lo tatou atunuu i lea tomai aoaoina, ae avea foi ma aso e toe tepa ai i tua i le tele o tausaga o aoaoina fanau a Samoa e faiaoga.
Ua talafeagai ma fetaui lelei ma le autu o lea faamanatu i lenei tausaga ua autu, o suiga i aoaoga e amata i faiaoga. O le afioga i le Sui Palemia le afioga Tuala Tevaga Iosefo Ponifasio, na fai ma sui o le Malo ma le atunuu e faafetaia ma ave le faamalo i faiaoga ina ua faamanatu lea aso tāua faavaomalo i lo tatou atunuu i le Aso Faraile ua mavae, sa faamanatu ai foi le aso o tagata faigaluega uma a le Malo.
Na saunoa le Sui Palemia ma ia faailoa, o le faafetai i le Atua ua ogatasi le faamoemoe ma le faamanatuina o le onosefulu tausaga o le Malo Tutoatasi e ala i le folau ma le faatuatua, ma ua faatāua ai le folauga amata ma le sao o Faiaoga, Puleaoga, o Asiasiaoga, Minisita o Aoga, o Pule Sili o Aoga ua lagomau i tiasa, ma i latou o soifua ma galulue pea, sa ogatia i le asaina o le gasu o le suiga lelei mo aoaoga.
O lea sauniga sa faia i le faletalimalo o le Taumeasina sa faatāua ai le sao o faiaoga, puleaoga, ma i latou uma sa galulue i lea tautua talu ona Tutoatasi lo tatou atunuu. O le Aso Sa na tea nei sa faia ai se sauniga lotu faafetai e autu lava i lea aso tāua.
