Ua faamaonia mai i lipoti, le maliliu ai o ni tagata se to’alua ina ua aafia i se mū na alia’e i se tasi o fale i le aai o Rakaia i le faaitu o Canterbury.
Ta’ua na alia’e lea faalavelave i le afiafi o le Aso Toonai, o le faai’uga o le la vaiaso.
Ma ua faamaonia mai o se pepe e tausaga le matua le tasi o tagata ua fano le ola i le afi.
Na valaau le vaega o faalavelave faafuase’i i le nofoaga mo se fesoasoani.
Ma e faapea e taunuu atu le vaega o le faalavelave faafuase’i ua maliu le tagata matua ae o le pepe o loo i se tulaga tigāina ma e fai lava sina tugā o manu’aga mai le mū.
Na faanatinati ona avatu sia alualutoto i le falema’i mo togafitiga, ae pagā na maliu lea pepe i le aoauli o le aso na sosoo ai.
Faamanino e leoleo, e lē o iai ni masalosaloga, pe o iai ni gaioiga faasolitulafono na afua ai le mū, ae ua tuuina atu nei tino maliu i le pule o maliu (coroner) mo su’esu’ega.
Ua faaalia foi le faanoanoa tele o tagatānuu o lea aai i Rakaia i le mea ua tupu, ma ua faaalia foi le tāua tele o le malamalama i i vaega uma e puipuia ai i latou mai mū e tula’i faafuase’i mai.
Puna o Faamatalaga: https://www.rnz.co.nz/news/national/575745/two-year-old-among-two-people-killed-in-canterbury-house-fire
