Ua faia se faamatalaga a lē sa avea muamua ma palemia o Niu Sila Sir John Key e faapea sa taumafai le malo tele o Amerika e faaaoga le Five Eyes i se gaioiga malosi faasaga ia Saina, a o Niu Sila o se sui o le Five Eyes, e na te faia faaiuga mo le lelei o tagata Niu Sila.
Fai mai Key o ia e talitonu i le mafutaga mafanafana a Niu Sila ma Saina ma e faigofie ai foi ona faatalanoa mataupu ogaoga. O se faatalanoaga sa faia a Key ma se ofisa faasalalau i Saina sa ia faia ai ia faamatalaga.
Ta’ua e Key e pei ona lipotia i le One News i lea faatalanoaga sa avea foi Niu Sila ma sui o le Five Eyes i le taimi na palemia ai a o le taimi foi lea sa malosi ai le mafutaga a Niu Sila ma Saina faapea Uosigitone ma ia faailoa ai e foliga sa taumafai Amerika e faaaoga le totino lea o le five eyes o se auala e fai ai se poloka faasaga ia Saina peitai ua faailoa manino e Niu Sila o ia e tutoatasi ana faiga faavae faavaomalo ma e fua ana faaiuga i le mea aupito sili ona lelei mo tagata Niu Sila.
Sa masani ona tetee Saina i le Five Eyes e pei ona faailoa i nisi o tusitusiga ae o le Five Eyes e aofia ai Ausetalia, Kanata, Niu Sila, UK ma Amerika. E le o ta’ua se finagalo faaalia o Amerika i faamatalaga a Key.
