O le faateteleina o solitulafono e aofia ai talavou ua lafo ai tuuaiga agai i le malo, o le sosaiete o tagata ma tamaiti foi peitai o se tasi o tagata o loo finau pea ma tetee i sauaga i totonu o aiga, ua ia faailoa i se faatalanoaga i luga o le Newshub i le vaiaso nei o mātua e ao ona feagai ma le matafaioi lenei mo a latou alo ma fanau.
Fai mai Floyd Ormsby o se tasi o amepasa mo le White Ribbon Day o i tonu e tatau ona silasila ai mātua i le tāua o le fai ma faataitaiga lelei i le fanau, role model.
Ua faia mai lenei faamatalaga a o faamanatu ai foi e le atunuu le aso o le lipine paepae ma o loo faatāua ai i le tausaga lenei le feau i le faaperetania ‘boys become the men we teach them to be’.
O le White Ribbon Campaign o se fuafuaga i le lalolagi atoa a le itupa o alii e galulue ai e faamuta sauaga i aiga ma soo se mea lava, fai mai Ormsby mo ia e lei iai se tasi e faataitai iai a o tuputupu a’e ma sa ola ane i totonu o sauaga ma sa fesoasoani tele lea i le totoina o se loto ita ia te ia ma o i lava sa matuai afaina ai lona olaga.
Ua ia luitauina ai mātua o le taimi lenei e fai ai le galuega o le faia o se faataitaiga lelei mo le fanau ona e fesoasoani foi lea i se suiga i le mafaufau o le tagata talavou.
