E tāua le fefaasoa’i ma fetufaa’i i auala e toe faaleleia ai le auaunaga, o le auga lea o le fonotaga sa faia a le Pulega o tagata tafafao mai Samoa e saili le tofa ma feliua’i le uta i nisi metotia, e le gata i lea o le tilotilo i ni lape o le auaunaga sa iai ua ala ai ona le tosina mai turisi i Samoa.
O lea faatasiga sa faia lea i le faletalimalo o le Tanoa Tusitala i Sogi ma na ta’ua e le Ofisa Sili o pulega o lea faalapotopotoga i le atunuu le Susuga Pativaine Petaia-Tevita, o le itu sa ave iai manatu ia unai le faia o lenei auaunaga o faletalimalo i le atunuu ma ia faamamafa lava le siitia o le talimalo lelei.
Ia lelei le faafeiloaiga o tagata atoa ai ma itu uma e moomia e le tau fesiligia e i latou o loo malaga mai.
Na ta’ua foi le itu tau i oloa gaosi i lo tatou lava atunuu mo le faatauina atu i fafo ia le gata e faateleina ae ia lelei lona gaosia, auā o le tasi lea auala autu o le tosina mai o tagata e fia oo mai e maimoa ia Samoa.
