Ua faamanino e le afioga i le Loia Sili a le Malo le susuga Su’a Hellene Wallwork le māfua’aga o le poloa’iga mai le Ao o le Malo na amata faamamalu i le faai’uga o le masina o Setema se’ia oo i le aso 29 o Oketopa ona o aafiaga o galuega a le malo i le itu tau tupe e pei ona faaaogā ai le Vaega 105 o le faavae e faataoto ai se tala o le tupe faanatinati mo galuega i totonu o le masina e tasi.
Ua faailoa e le Loia Sili e talu ai o loo lava le faasoa tau tupe a le Matāgaluega o Tupe a le Malo ae ua lē mafai ona aapa iai le malo ona e le’i pasia se tala autū masani o le tupe e ala i se tulafono, ina ua teena le tala o le tupe e le Palemene i le masina o Me, o le māfua’aga lea o le tulaga ma’ale’ale ua iai nei i le fia maua o ni seleni mo nisi o galuega ma auaunaga a le malo.
O le Aso Gafua a sau e tauaofia ai le Palemene e faataatia ai le tala autū o le tupe masani, lea e pei ona faailoa e le minisita o tupe e mo le umi e valu masina e amata mai i le masina fou o Novema e oo i le faai’uga o Iuni o le tausaga fou 2026.
O totogi o tagata faigaluega a le malo ma ovataimi o loo ave iai le faamuamua o le fuafuaga tau tupe faanatinati mo le masina e tasi lea ua galulue ai le matāgaluega o tupe a le malo.
Ua faaalia e le minisita o tupe i le feiloa’iga ma tusitala i le Aso Faraile ua mavae, e talafeagai lelei le pasia o le tala autū o le tupe ma le fuafuaga tau tupe mo le masina e tasi o le a faagaioia ai nisi o auaunaga sili ona tāua a le malo o loo moomia ai tupe i le taimi nei.
Mo le silafia ina ua teena le tala autū o le tupe e ala i le tulafono taufaaofi o le faatatauina o tupe sa faataatia e le minisita o tupe talu ai le afioga Lautimuia Uelese Vaai i le Palemene i le faai’uga o Me o le tausaga nei, sa faatupe galuega a le malo i le taimi mai le masina o Iuni e oo ia Aokuso le masina na faia ai le palota tele faanatinati i le 25 pasene o le aofa’iga o le tala autū o le tupe o le tausaga faaletupe 2024 i le 2025.
E tusa ma le 300 miliona tālā sa faasoasoa e le malo tausi i totogi o tagata faigaluega ma nisi o auaunaga sili ona mana’omia.
E ulufale atu le faigāmalo fou ae fautuaina e le matāgaluega o tupe a le malo ua toe tasi le vaiaso o seleni o loo totoe mo le faaauauina o galuega, o le māfua’aga lena o le mana’omia loa e le faigāmalo fou o se poloa’iga e faafoe ai le malo i se fuafuaga tau tupe faanatinati poo se emergency budget a o tālia ai nei le tala autū o le tupe o le a folasia i le laulau a fono a le fono aoao faitulafono e pei ona faatulaga mo le Aso Gafua a sau nei.
Pe ana pasia le tala o le tupe na faataatia i le masina o Me, e oo mai i le taimi nei e leai ni tulaga lē mautonu i le faasoa tau tupe a le malo.
