Ua faailoa mai e le afioga i le Loia Sili, susuga Su’a Hellene Wallwork, ua mae’a mataupu sa finau ai Talalelei Pauga i lona apili o le faaiuga a le Malo o Ausetalia i le talosaga a le Malo o Samoa e aumai faapagota e tali i ona moliaga i Samoa, ma ua lē manuia.
Na pau le vaega o loo faatali nei iai, o le taimi e logo mai ai e le Loia Sili a le Malo o Ausetalia, le aso e aumai ai Talalelei Pauga i lo tatou atunuu.
Na faaalia e Su’a e tatau ona faatino lea tulaga i le tausaga nei ma o leoleo foi mai Samoa, o le a malaga e aumai faapagota lea tagatānuu o Ausetalia e tali i lona moliaga o le taupulepule e faaoo le maliu i le susuga Tuilaepa L Sailele Malielegaoi, o lē sa avea ma Palemia.
O le moliaga lea o loo molia faatasi ai ma isi e toatolu, Taualai Leiloa na ioe ma o loo tuli lona faasalaga faafalepuipui.
O isi e toalua o Lema’i Faioso Sione ma Malele Atofu Paulo, ua mae’a suesue o la moliaga ma ua faamaonia ae o loo faatali le taimi e lau ai ni o la faasalaga.
