O le faalauiloa o faatosina o faigāpalota poo le campaign a le vaega faaupufai a le Greens ua folafola ai e le tama’ita’i ta’ita’i o le vaega faaupufai, Marama Davidson, o le latou anavatau lea ua aga’i atu iai, ina ia faamutaina le mala o loo feagai pea ma le to’atele o tagata Pasefika o le leai o ni fale e nonofo ai (homeless), ia faamalosia atili aiā tatau a tagata nofo mautotogi, ma ia fo’ia le malapagā o loo iai i fale mautotogi, e aofia ai le lua pasene lea e faaopoopo i tausaga uma i siitaga o tau o falemautotogi.
Saunoa Davidson, o le to’atele o tagata ua foliga mai ua latou talia lava o se mea masani mo aiga le feagai ma faigatā i le taugatā ma le faigatā ona maua ni fale, ae ou te fia faailoa atu, e lē tatau ona iai na lagona.
O ni faai’uga faapolokiki ua mafua ai ona tatou iai i le mala o iai nei, ua oo ai i le tulaga ua fausia fale ia muamua ona ua’i ia vave mau’oa ai nai lo le saunia o fale e gafatia mo tagata e nonofo ai.
Fai mai Davidson, e mana’omia ona inivesti i fale o le malo; e lē mafai ona tatou faalagolago tasi i tagata e ona fale mautotogi poo landlords e saunia mai tau o fale mo tatou.
E lagolago foi e le tama’ita’i ta’ita’i le fuafuaga a lana patī o le Progressive Home Ownership Model, o se fuafuaga o le rent-to-own ua fuafuaina faapitoa ina ia fesoasoani i tagata Pasefika e mafai ai ona latou faatauina ni falemotu.
O le taimi nei e 16.8 le faapaseneina o tagata Pasefika o loo umia o latou falemotu pe a faatusa i le pe ā ma le 66 pasene o tagata e iai falemotu i le atunuu atoa.
O le itu foi lea o loo aga’i iai le faalauiloa a le vaega faaupufai a le ACT, e pei ona saunoa iai le latou ta’ita’i, David Seymour ina ua faatalanoa i luga o le Pacific Mornings i le taeao analeila, na ia ta’ua ai, o se taimi lata mai ona faalauiloa lea e lana patī se ta’iala fou poo se faiga faavae mo le itu tau fale.
Puna o Faamatalaga: https://pmn.co.nz/read/political/pacific-led-housing-push-highlights-big-home-ownership-gap
