O le asō o le a toe solo tetee ai tausi soifua mai falemai tutoatasi e tolu o loo pulea e le Evolution Healthcare.
Ua faamaonia mai e le faalapotopotoga o tausi soifua o le asō e toe tetee ai fomai o loo galulue i le falemai a Wakefield faapea Bowen i Ueligitone ma le falemai a Royston i Hastings.
O le lē fiafia lava i le leai o se taunuuga manuia o loo finauina ai totogi le mafuaaga ma e faapea talu mai le aso 6 o Setema na faia ai talanoaga e saili se maliega e autasi iai, e lei toe maua lava se isi feiloaiga a tausi soifua ma le pulega.
A o leai ai se feiloaiga, o nai aso e lei mamao atu na faalauiloa ai e le pulega nisi o faamatalaga e faatatau i le ofo fou i luga o faasalalauga a ofisa faasalalau, ae mai tausi soifua, e leai ni feutanaiga ua faia i luga o ni faasalalauga.
O itula o tetee i le asō, o le falemai a Wakefield e mai le 11 i le taeao i le itula e 2 i le aoauli, o le falemai a Bowen e mai i le itula e 3 i le aoauli e oo i le ‘afa o le 5 i le afiafi, ma Royston e mai le itula e 10 i le taeao nei i le 12 e oo i le aoauli.
O totogi o loo finau mai ai tausi soifua o loo faafaigaluega i nei falemai tutoatasi o totogi e tutusa ma tausi soifua o loo galulue i lalo o falemai tetele lea o loo i lalo o le matagaluega, atoa ai ma suiga o taiala mo le auaunaga.
