Ua faamautinoa mai e le alii lakapi liki ta’uta’ua a Niu Sa Uelese, Jarome Luai, o le a sauni e taalo mo Samoa i le taamilosaga o le Ipu a le Lalolagi mo le lakapi liki.
Ua to’alua ai Luai ma Brian Too o i laua uma e taalo mo le Penrith Panthers ma le Blues, ae o lea ua manana’o e auai atu i le ‘au liki a Samoa, le Toa Samoa mo taaloga o le taamilosaga o le Ipu a le Lalolagi o le a faia i Egelani mai le aso 15 Oketopa seia oo i le aso 19 Novema 2022.
E iai lipoti ua ta’ua ai, e ono mulimuli atu foi i ai ma le tama taalo lauiloa a le Queensland ma le Raiders, le alii o Josh Papalii. O i latou uma nei e to’atolu sa taalo muamua foi mo Samoa.
Na ta’ua e Luai i sana faamatalaga na faia i luga o le NRL.com ‘O le a ou taalo mo Samoa. O lo’u mana’oga moni lena, ma o le auala lena na tausi a’e ai a’u.’
Ta’ua e Luai, e ui lava ina ola a’e ma nofo i Ausetalia, ae o le olaga lena o tatou. E tatou te ma’au lava i o tatou sootaga faa-Polenisia.
O le olaga lena na tausi ane ai tatou i o tatou aiga Samoa ma tatou ekalesia Samoa. Ma ua totō ma maua’a i o tatou loto. Fai mai le alii lakapi, e talosia e lē tele ni faitioga i lana filifiliga ua fai.
O le aso 15 o Oketopa e tala malae ai le ‘au a Samoa ma Egelani i le uluai taaloga o le Ipu a le Lalolagi.
O Jarome Luai na soifua mai le aso 16 Ianuari 1997, ma ua 25 nei ona tausaga. O le tausaga 2017 na taalo ai foi Luai mo Samoa i le taamilosaga o le Ipu a le Lalolagi.
