Ua tapisa ma vāvāō le to’atele i luga o upega tafa’ilagi ona o le i’uga o le tauvaga o le sailia ai o sē o le a avea ma Tausala o le Pasefika 2025-2026 ina ua toe sola Samoa ma le pale o lenei tausaga, le tamaitai o Litara Ieremia-Allan.
E to’atele na manatu o le Tausala mai Tonga sa tatau ona manumalo, o nisi e faapea o le sui tauva mai le motu i Sasa’e, mai Amerika Samoa sa tatau ona faapaleina.
O nisi na faia lafoga ma tuua’ia ma fesiligia le moni o le faatautaiga o le faai’uga a le sui faamasino mai Samoa le afioga Leiataua Jerry Brunt.
Ae e ui i nei mau faamatalaga ua lafo, o atugaluga, ma le vāvāō o tagata i luga o upega tafa’ilagi, ae na manino lava le saunoaga a le sui tauva mai Amerika Samoa e tusa ai ma taualumaga o le tauvaga.
Na molimauina le agaga malamalama o le tamaitai o Pauliana Felise-Vitale, ae o le agaga o le lagolago i lona uso tauva, o lē ua seei mai le nofoa, le tamaitai o Litara Ieremia-Allan, i le avea ai ma Tausala o le Pasefika 2025-2026.
O le Tausala o Amerika Samoa, Pauliana Felise-Vitale na manumālō i le vaega o le taleni poo le Talent Category, o se tasi o vaega lautogia o le tauvaga, o le Tagata Tausaafia, poo le Miss Personality ma le faailoga o Tagata Tafafao, poo le Tourism Award, ma na tulaga tolu i le tauvaga atoa.
Ua amata ona toe foi tamaitai tauva, ma ua faamauina o le Aso Lua o lenei vaiaso ua valaau ai le komiti i tagata Amerika Samoa uma mo se faatasiga poo le Homecoming e faafeiloa’ia ai le toe taliu atu o le tamaitai Tausala ma sui sa aga’i i Solomona mo le tauvaga.
O le a patipatia ai taumafaiga sa alo atu ai lo latou sui i Solomona.
