E le o toe mamao se taimi ona mafai lea ona siaki e le tagata le talaaga o sana paaga i tulaga tau sauaga i totonu o aiga e ala i le faaaoga ai o se faiga fou ua faalauiloa nei.
O le setete o Niu Sa Uelese lea ua faailoa mai ai lea faiga fou o le a mafai ai ona e siakia pe iai se talaaga o lau paaga i tulaga tau i sauaga i totonu o aiga, o se faiga fou ua faalauiloa e le faigamalo a le setete.
I lalo o le faiga lea ua faaigoa Right to Ask o le a mafai ai e tagata o loo aafia i ni sauaga i totonu o aiga ona fesiligia ofisa o leoleo i Niu Sa Uelese e faatatau i talaaga o amioga a latou paaga pe sa aofia muamua i ni mataupu tau sauaga.
Fai mai i latou o loo faafoeina lenei faiga fou aemaise le premier o le setete o le matuai tele o mataupu faamomoiloto e aofia ai tamaitai poo alii foi ua maliliu ona o sauaga i aiga ma e saili atu foi talaaga o tagata o loo aafia e fai si lē manuia ae peitai latou te lei iloaina muamua lea tulaga.
O lenei faiga fou ua fuafua e faaofi iai ma se sao o faalapotopotoga o loo feagai ma auaunaga nei e agai i sauaga i totonu o aiga ma o le a mafai foi ona avanoa i gagana eseese e aofia ai le gagana Peretania.
