Ua sauni le malo e fausia se auala laupapa i luga ane o le State Highway 25A i le mae’a vaaia o tulaga na faaleagaina i le taimi o le afā o Gabrielle atoa ai ma lologa i Aukilani.
O le asō ua saunoa ai le minisita o felauaiga, Michael Wood ua taliaina e le malo fautuaga e faatatau i le fausia o se auala laupapa o le auala sili lea mo femalagaa’iga i lea faaitu ma o le a agai sa’o loa taumafaiga a le malo i le faatupeina o lea taumafaiga.
Fai mai lipoti e tolu vaega sa silasila iai le malo mo se tali mautu i le auala i lea faaitu, peitai ua manatu nei o le a fausia le auala laupapa lea e suia ai le State Highway 25A i Coromandel.
Ua faailoa i lipoti e i le va o le 30-40 miliona e fausia ai lea galuega.
