O upu ia o le lauga a le Afioga i le alii Minisita o le Matagaluega o Tina ma Tamaita’i, Atina’e o Nuu ma Afioaga ma Aga Fesoota’i, le Afioga Leota Laki Lamositele i le taeao nei.
E silia i le 3,000 tagata na auai i le solo tele, e tatala ai le 16 aso o le tutulai faatasi e tetee atu i sauaga i Tina ma Fanau, le polokalame ua faaigoina o le ‘Malu i Fale’.
E lei afeia upu ina ua mautinoa e le o foia le faafitauli lenei e ui i le tele o tupe ma faatinoga ua faia e le gata o le Malo o Samoa ae o Faalapotopotoga eseese e aofia ai ma Malo Aufaatasi.
O le autu o le solo ma le polokalame lenei mo le 16 aso ina ia avea Samoa ma atunuu e saoloto mai sauaga. O faailoilo ua tusia ai upu e tafi ese sauaga i tina ma fanau na saunia e faalapotopotoga eseese na auai e aofia ai ma nisi o afioaga i le atunuu, na fai lea ma taulaiga o tagata sa molimauina lea faamoemoe i le solo na amata mai luma o le ofisa o le Fuimu i Apia e oo atu i lumā maota o le Fale o le Malo i Matagialalua.
O le saunoaga a le alii Minisita ua mautinoa ai e le o faaitiitia lenei faafitauli. Ua faamauina e 46% le aofa’i o tina na sauaina e o latou taitoalua i le tausaga 2000 ina ua faia le suesuega, peitai ina ua toe faia lea lava suesuega i le 2017 ua faamauina ai le tusa ma le 60% le aofai o tina ua sauaina. E tusa lea ma le 14% na siitia ai lenei faafitauli i totonu o le 17 tausaga. E le taulia ai le aofai o fanau ua sauaina na maua i le suesuega lenei lea e tusa ma le 90%.
Na faailoa mai e le alii Minisita o lona uiga afai e toe fai se isi suesuega e foliga mai e ono siitia pea i luga. E ui i taumafaiga a le malo ma ana paaga ina ia faaitiitia lenei amioga ua pei o se faama’i peitai e le o faaitiitia lava. E oo lava foi i le polokalame lea, na faailoa e Leota e le o taofia ai lava sauaga.
“E lata i le miliona tala i le tausaga tupe faaalu a lo tatou malo ma ana paaga i nei taumafaiga ae le o tulai mai i se tulaga lelei e tatau ona iai. Ou te manatu ua tatau ona fai se isi faiga e ese mai i le lagiina o pese, tauvaga tauloto, o tala tusitusia, ata tifaga, o faigalotu, meataumafa, semina, fonotaga, soalaupulega, taavale teuteu ma isi laei, lanu piniki, sui i le lanu samasama, ia a lea ua laei uli.
Talosia ia ae iai se suiga i le lanu ua laeiina i lenei tausaga”. “Samoa e, o fea ea le aganuu o loo tatou alalaga ai nei…e ola ma oti le tama e puipui i lana feagaiga…fea ea lou faavae Samoa e Faavae i le Atua. O le Samoa ea lea na manunu mai o tatou matua ua tofafa mai atutia tatou te soifua ma ola ai?” “A o ai le tagata e fiamalosi ma fiasili ma faaoo sauaga, ae oo i le Atua e ana le tagata na te le mafaia ona faia lea mea? Saunoa le Alii Minisita o nei taumafaiga ma le faama’ite e faatāua ai le amata i totonu o tatou lotoifale…. “
‘MALU I FALE’ o loo iai le tama agamalu, alofa, onosai, faapalepale ma loloto le tofa e faafoe ai lona auaiga….’MALU I FALE’ o loo iai tane e iai le alofa faa-Keriso ma le lotomaualalo e vaai ai i lona toalua e ese le aulelei, o se paaga e tutusa ma lana fanau, o ni oloa tāua e fai ma tamai olive i lana la’o’ai i aso o i luma…
’MALU I FALE’ o loo teu i le feavata’i ma ta’ui i le fetausia’i ma le talanoa faaleaiga i taimi uma ma aso uma”.
O le tatalo a le alii Minisita i tamatane o loo toilalo pea i lenei tu ina ia tulai mai e faia se suiga, ma fai se sao e fofo lenei gasegase ua sasao faaafi.
Na mae’a saunoaga ona tatala lea o nisi o tusi faitau, o ata faaalia ma le pese na saunia e le faaili lauiloa o le Punialavaa.
