O Muliaga Ioane Stanley poo John Stanley ma le tama’ita’i o Maysabell Nickel ua faasala e le faamasinoga i le falepuipui, ona o solitulafono i le umia o le pauta faasāina o le ‘aisa.
Na molia John Stanley ona o se galuega a leoleo na su’eina ai le taavale sa malaga ai ma lea tama’ita’i ma se isi alii talavou ma maua ai ni taga pepa iila laiti se tolu o loo iai le ‘aisa e tusa ma le 0 tesimale 36 kalama le mamafa faapea se masini o se fua poo le scale.
O lea pauta faasāina ma le masini na maua i se sa’iliga a leoleo i le taavale a lea taulealea sa o ai ma lea tama’ita’i e fai lana saini i le ofisa o leoleo ona o se isi moliaga tau fualaau faasāina.
O le tama’ita’i o Maysabell sa molia i lona umia o le 0 tesimale 24 kalama o le ‘aisa lea sa maua o ia umia ina ua siaki lona tino i le falepuipui i Tanumalala sa nofo taofia ai i se isi moliaga solitulafono.
I le faamaonia ai o ia solitulafono ua nofosala ai John i le umi e 12 masina ae o le tama’ita’i o Maysabell Nickel e 36 tausaga lona matua e 4 masina i le falepuipui.
O le fautuaga a le faamasinoga i le tama’ita’i, ua tatau nei ona silasila mamao i sona lumana’i manuia pe a magalo mai le falepuipui, ma ia filifili ma le poto pe faaauau pea le la mafutaga ma John poo le faatāua o lana fanau.
O John Stanley ua 45 tausaga o le soifua o se tasi sa maualuga lona taumafai i le taaloga lakapi sa filifilia ai i le ‘au o le Samoa A.
