E 2 tausaga ma masina e 11 ua faasala ai i le falepuipui e le faamasinoga maualuga le taulealea o Falaniko Seumanu o Vaitele tai, ina ua faamaonia lona ioeina o le moliaga o le ave taavale faatalale ma faatamala, na mafua ai ona maliu Tomasone Ama Kelekolio Soesa o se tane 45 tausaga o le soifua, ae aafia ni alii se toalua i ni manu’aga tuga. 

O faamaumauga a leoleo i le faalavelave e pei ona sa faailoa i le faaiuga a le faamasinoga o loo ta’ua ai o Mati o le tausaga 2021 na tupu ai le faalavelave ina ua taavalevale le taavale na faafoe e lē ua faia iai le faasalaga faafalepuipui.

O le mae’a o le bbq ma se inuga a lē ua molia ma lē ua maliu ma taulelea e toalua na manunu’a tigaina, na alu ai Falaniko i le taavale e momoli lē ua maliu i se isi o latou aiga e tofa ai.

O lē ua nofosala e faapea mai faamaumauga a leoleo sa ia taumafaina le fagu voka o le maso. O lē ua maliu ma i laua na aafia i manu’aga ona o le lavea o le taavale sa latou taumafaina le pusa Taula Strong.

Na tetee muamua Falaniko i moliaga ae na toe suia lana tali i le ioe ma aumai ai loa le faaiuga i le faasalaga.

Ua faaopoopo i le faasalaga i le falepuipui le 4 tausaga e le toe tago ai i le foeuli o le taavale ma tapu ai foi ona ia toe umia se laisene avetaavale.