O le faatupulaia pea o solitulafono tau faiaiga e aafia ai fanau teine aemaise mataupu i le isi o sootaga faaleaiga o lē e faia ia solitulafono ma lē e aafia, ua lē solomuli ai le faamasinoga i le faia o faasalaga e momoli atu ai se feau ia i latou o mafaufau e faatino ia ituaiga o soligatulafono.

O se tamā ua 68 tausaga o le soifua ua amata tuli nei lona faasalaga i le falepuipui e 3 tausaga ma le 6 masina, ina ua faamaonia lona moliaga o le pule lē uma e ala i se gaioiga na ia faatino i le afafine o lona atalii ua 12 tausaga le matua, ae e iai ona manaoga tumau.

Sa tutumau lē ua faasalaina e mamā mai le faia o le solitulafono ma ia tuua’ia lona atalii ma lona toalua i le fafauina o se tuua’iga ia te ia.

Peitai i faamaumauga a le faamasinoga mai le suesueina o molimau, sa iloa ina ua tulai lē na aafia mo lana molimau tuu fofoga le faigata ona ia faamatala ona lagona i le mea na tupu ona o mafatiaga mai le solitulafono na faatino ia te ia.

Ua tapu e le faamasinoga ona faailoa suafa ma soo se faamatalaga e iloa ai lē ua molia ma lē na aafia ona o sootaga tau aiga.