Ua aumai se feau malosi mai le faamasinoga mo mātua ma i latou e faia sauaga i fanau, e lē‘alo le tulafono i le faia o faasalaga talafeagai mo i latou e faamaonia lo latou sauaina o fanau.

O le lapataiga ma le feau lenei na aumai e le afioga i le tamaitai faamasino le afioga Niava Mata Tuatagaloa ina ua lau le faasalaga faafalepuipui o le tamā o Toma Akuino Tovia o Moamoa ma Palisi, ina ua faamaonia lona moliaga o le faaoo o ni manu’a ogaoga ma tuga i lona atalii 12 tausaga le matua ua fano le ola ona o lea gaioiga.

E 4 tausaga ma le 10 masina ua faasala ai i le falepuipui lea tamā ae toese ai ni aso sa nofo taofia ai, a o tālia suesuega a leoleo ma se faaiuga a le faamasinoga.

O Tesema o le tausaga 2022 i Palisi na tupu ai le solitulafono ina ua faaaogā e Toma le ‘au o le salu e ta ai le ulu o lona atalii.

Faaalia e leoleo o le tea o le sefulu i le po na tupu ai lea tulaga ina ua mae’a se inuga ‘ava Samoa a lē ua faasalaina ma nisi o ana uo.

Na faaalia i faamaumauga a leoleo na faatonu e Toma o lona atalii e faatietie le tipoti e tunu ai se suati mo ia ma lona toalua, ae peitai na faalogo atu lē ua molia o loo muga lona atalii i lona afafine matua.

O le mafuaaga lea na savali atu ai po lona atalii ma palasi ai i lalo, ma tago loa i le salulima ua sasa ai lona atalii i le au, lea na mafua ai ni manu’a ogaoga i lona ulu ma ave ai i le falemai.

O le lipoti a le fomai na vaaia le atalii e tuga tele ni manu’a i totonu o le ulu, o le mafuaaga lea o le fano o le ola o le tamaititi.