O aiaiga o le tulafono o faigapalota ua avanoa ai tagata palota e umia suafa matai o isi nuu ina ia palota i tumalo o loo nonofo ma faamautu ai, ae le mafai ona avea ma sui tauva, ua toe masua mai i fafo a o tapena le itumalo o le Vaimauga 3 i lana palota laititi.
E iai tagata palota o lea itumalo ua na ona palota ae le mafai ona tauva ona o suafa matai o isi nuu i isi itumalo o loo latou umia faaletulafono.
O se tasi lea o aiaiga o le tulafono o faigapalota o loo toe silasila iai le Komisi suesue o faigapalota lea ua fuafua o se taimi o le masina nei poo le masina fou o Fepuari e tuuina atu ai le latou lipoti i le Palemene.
O loo tuuaia e nisi lea aiaiga e faailogatagata ona e na ona avanoa ona palota mo sui faatutu e umia suafa matai o nuu mavae o le itumalo palota o loo nofomau ai, ae faasā ona avea ma sui tauva i le sailiga o le tofi faipule i le Palemene o le itumalo ua faatau ai lona fanua ma atiina a’e ai lona aiga.
O loo laugatasia uma itumalo palota e 51 i lea aiaiga faaletulafono. E faatoa mafai ona avea ma sui tauva se matai o mau i se isi itumalo ma faamautu ai, pe a fai lana monotaga faalenuu i le itumalo o loo matai ai.
