O se tasi o pisinisi kava i Aukilani ua lipotia o loo aofia i se faafinauga faaleaganuu ina ua laga popolega e faatatau i le lumana’i o le kava o se tu ma aga faa-Pasefika.
Ua ta’ua e le RNZ o le Vibes Kava na amataina e Charles Byram ma Derek Hillen o loo faagaioia mai i Grey Lynn ma na amataina le pisinisi i le amataga o le tausaga, fai mai o se avanoa e fesoota’i ai ma se nofoaga mo le komiuniti.
O Byram o se tagatānuu o Niu Sila ma Amerika Samoa, ua toe foi mai i Aotearoa mai Amerika a o Hillen o se tagata mai Kanata na me’i mai i Niu Sila e aumau ai i le 10 tausaga talu ai.
Ua ta’ua i le lipoti ua iai nisi ua faaseā i lea auaunaga fai mai nisi ua lē sa’o ai le faauigaina o tu ma aga Pasefika, ma e lē o faailo ai le loloto o le tāua o le kava.
E iai nisi o videos i luga o upega tafa’ilagi, o faalauiloa a le pisinisi lea ua faaali ai foi finagalo o nisi mai le Pasefika sa talanoa i le RNZ, ua faailoa ai e tāua le kava ma e ao ona faasa’oina pea le malamalamaga e faatatau i le kava ma lona tāua i komiuniti a le Pasefika.
Ua ta’ua i le lipoti le tali a Byram e na te matuā malamalama i vaega uma ua lāgā atu, peita’i e foliga ua faamasinoina o ia i le lanu o lona tino ae lē o lona malamalamaga auā o ia foi o le Samoa.
E ui i lea fai mai a ia e to’atele paaga Pasefika a le pisinisi o loo lagolago atu ma fiafia o loo faailoa atili atu le aganuu i le auaunaga o loo faatinoina, pau foi le naunauta’iga ia i laua o le faamanatu o sia vaega tāua o le aganuu.
Puna o Faamatalaga: https://www.rnz.co.nz/international/pacific-news/560674/we-re-just-doing-our-best-cultural-backlash-hits-auckland-based-kava-business
