O le minisita mai Farani o Francois Noel Buffet o le a malaga mai i Niu Kaletonia i le vaiaso fou e lagolago i latou uma i le atunuu o loo aofia i le mataupu o vesiga na alia’e i le aso 13 o Me.
O le minisita lea e fou nei lona filifiliaina o se vaega o le Kapeneta a le Palemia fou o Michele Barnier.
I lana ulua’i lauga i mataupu faalaua’itele i luma o le French National Assembly na ta’ua ai e Barnier ua iai foi se isi faiga fou ua faia e faatatau ia Niu Kaletonia ma o le a lē toe tulituliloaina le pili poo le constitutional bill lea sa taula’i i le toe fetuuna’iga o agavaa mo faigapalota faalotoifale.
Ua ia folafola foi o faigapalota faaitumalo sa masani ona faia a o lei oo i le aso 15 o Tesema o le a toe tolopo atu ia Novema o le tausaga fou.
I le malaga la ua fuafua mai a le minisita e pei ona ta’ua o le a feiloa’i ai ma sui o le atunuu o loo iai i upufai o malo aemaise auaunaga tau le tamaoaiga ma isi aemaise o le faaauau o talanoaga ma una’ia le toe fausia o le atunuu.
Ua mae’a foi ona faailoa e le Palemia o Farani o loo iai le fuafuaga a le peresetene, Emmanuel Macron e na te talimalo i ta’ita’i uma faapolokiki o Niu Kaletonia i Paris mo se fonotaga i se taimi o Novema.
Puna o Faamatalaga: https://www.rnz.co.nz/international/pacific-news/530224/france-s-new-overseas-minister-to-visit-new-caledonia-next-week
