Ua na o le o atu o ambulance ma laina i fafo o le Emergency Department (ED), ma o nisi o taavale nei e faapea e oo atu i le 4 itula o faatalitali.
O le tulaga lea na oo iai i le Aso Gafua o le vaiaso nei i le falemai i Waikato a o pisi ai ma agai atu le toatele i le ED.
Lipotia e le Newshub o lea na oo lava i le 12 taavale ambulance na o le o atu ma faatalitali, ma o le lima o ia taavale o loo iai i totonu gasegase tigaina.
Molimau ai se tasi o fomai sinia i le ED a le falemai i Waikato, talu ona faigaluega faatoa oo lea i se sifi ua matuai pisi faapea.
Ua tuuaia ai e fomai i le ED le lē lelei o auaunaga a falemai i tua e pei o le mafuaaga lea o le sulu atu o le toatele i le ED ona o le leai o se avanoa e vaaia ai le fomai, lē lava le aufaigaluega faapea ai ma le leai o ni moega.
Faamaoniga mai le falemai i Waikato, e 85 tagata na auina atu i taavale ambulance i le Aso Gafua.
Ae mai le pulega a le St John, o lea ua faia talanoaga ma sui sinia o le Te Whatu Ora ina ia mautinoa e lē toe tupu le mea lea na tupu i le Aso Gafua e le gata i tagata ae faapea ai lana aufaigaluega.
