E faapea o le tamā o fanau e to’alua na maua toega o la tino maliliu i totonu o atopa’u, ua lima tausaga talu ona maliu i le kanesa.
A o su’esu’eina ai pea auivi o fanau e to’alua na maua e le aiga Aukilani i totonu o atopa’u, o le tala lata mai lea na sau i tua i le faai’uga o le vaiaso.
Lipoti a le Stuff i le Aso Toonai, e faapea o ia fanau e to’alua, o le tama ma le teine ma na fananau i Aukilani i le 2009 ma le 2012.
O mātua o fanau e omai uma mai Korea i Saute ma na faaipoipo a o nonofo ai i Niu Sila, ma o le 2017 na maliu ai le tama ona o le kanesa ae e le’i toe tuua e le tina o tamaiti Niu Sila.
A o galulue ai leoleo Niu Sila ma isi ofisa leoleo i atunuu i fafo, o loo ta’ua mai ai foi i nisi o lipoti e iai le tina o loo talitonu e fesoota’i ma fanau maliliu sa i Korea i Saute.
E lē o mafai ona o faailoa igoa o fanau ma aiga ona o le poloaiga ua tuuina mai a o faaauau ai pea su’esu’ega.
