O leo o le foafoa, ma le mumū o nifo oti o le siva ailao afi, ae aiaiuli ai le faaumuumu poo le tuliususu na faafeiloai ai le taunuu i le faletalimalo o le Lava hotel, o le tagata muamua o le aulakapi o le Toa Samoa ua taunuu i Samoa a o lumanai le vaiaso fou o le a taunuu ai le ‘au atoa ma le pulega mo le tali faaaloalo a le Malo ma lo tatou atunuu.
O le susuga Joseph Su’aalii 19 tausaga e taalo i le tulaga o le fullback mo le Toa Samoa, ua muamua malaga mai a o loma le faamoemoe i le ogatotonu o le vaiaso asau.
Ua lipotia o le muamua mai o lea sui o le aulakapi liki a le atunuu o le fia auai i saofai a lona aiga o le a faaee ai ma sona suafa matai.
E lei mautu mai poo fea le afioaga o le a faatino ai lea faamoemoe o Joseph Su’aalii, ae o lona toai taunuu i Samoa o se tasi o vaaiga o le a tomua i le tapuaiga a le atunuu i le fia feiloai atu i le ‘au atoa pe a faataunuu le faamoemoe e pei ona loma nei i le mae’a o le faamanatuina o le Kerisimasi i le Aso Sa o muamua nei.
