E oo atu i le to’alimasefulu tagata tineimu, o loo taumafai e tali atu i le sasao o le afi o loo tula’i mai i Glen Innes.
Faamauina i lipoti mai le leitio faavaomalo a Niu Sila, e maitauina o le ofisa o le WINZ poo le Work and Income New Zealand, lea ua faatama’ia e le mu tele ma na molimauina ai le ufitia o le pitonuu atoa i le asu.
I lipoti o loo ta’ua ai, o le itula e 7 i le taeao nei, na alia’e mai ai lenei faalavelave, ma ua faamaonia mai e le faauluuluga o le vaega o tineimu, Shane Munro, e 15 taavale tineimu o loo iai i le nofoaga e fesoasoani e teineia le mu.
Ta’ua o loo faasolo nei siaki ma iloiloga a le ofisa mo nisi o itu, ina ia mautinoa e lē o afaina nisi o fale o loo i autafa o le WINZ.
Ua poloka nei e leoleo faaitu o Mayfair Place, faapea ai Taniwha Street ma Apirana Avenue.
O loo talosagaina foi e leoleo tagata femalagaa’i ma avetaavale e vaavaai nisi o faaitu e aga’i iai ona o poloka, ae ua fautuaina tagata o loo alaala i lea pitonuu ina ia tapunipuni uma faitoto’a ma faamalama mai le oo atu o le asu i totonu o o latou maota ma laoa.
I le taimi nei o loo tālia se tali mai o le Matagaluega o Atina’e o Agafesoota’i (Ministry of Social Development) i le tulaga o lenei faalavelave.
Puna o Faamatalaga: https://www.rnz.co.nz/news/national/560302/50-firefighters-battle-blaze-at-winz-office-as-smoke-billows-over-auckland-s-glen-innes
