Na alafa’i mai lava tagatānuu o Colwill Road i faaitu o Massey i lo latou molimauina ai o se mū na tupu ane i se fale o le latou tuaoi, ma vaaia ai le faanatinati atu ai o le vaega o le tineimu ma faalavelave faafuase’i e tali atu i lenei faalavelave.
Faamauina e lima vaega poo fire brigades na tali atu i le valaau atu ai mo le fesoasoani i le nofoaga i le toe 8 minute i le itula e 5 i le vaveao o le Aso Tofi.
Ae i ripoti mai le NZ Herald na ta’ua ai, o lea fale e foliga mai e iai ni masalosaloga a leoleo iai (place of interest) ae o lea ua faatāma’ia e le afi.
Ta’ua sa iai foi ni malu o le malo i le nofoaga ae vaaia loa le sasao o le afi i le fale.
Faamaonia e tasi se tagata na faatino iai iloiloga i lea lava nofoaga ma avatu ai i le falema’i i Waitākere, ma e lē o iai i se tulaga tigāina; e faapea sa aafia lea tagata ina ua ‘ai e se ta’ifau.
Faamatala e le to’atele o tagata e nonofo lata ane, e pei o se ata tifaga la e matamata iai ina ua o latou molimauina ma faalogoina le leotele o le pā e pei o se pomu ua pā.
Ae o latou vaaia ai leoleo ma a latou ta’ifau ma leoleo ua faa’au’upegaina.
O nisi ua faamatala, na o latou faalogoina le leo tele o valaau a leoleo mai i tagata ona o le mata’utia o le afi ua sasao.
Māua foi o lea lava fale sa aafia muamua i se mū i le vaiaso talu ai ma sa tali ai le tineimu e fesoasoani i lea faalavelave.
Faamauina na faato’ā mafai lava ona maua sina to’a i lenei mū i le to’a 20 minute i le itula e 7 i le taeao o le Aso Tofi.
