Na talalī se tasi o vaalele i le malaevaalele i Tokyo i Iapani, ma i lipoti na muamua fetoai ma le isi vaalele i le taimi na tulaueleee ai.
Na ta’ua mai e le NHK TV o se tasi o vaa a le kamupani vaalele a le Japan Airlines, ma e 379 lana pasese na sau ma ia, ma e faafetaia o loo saogalemu uma.
A o saogalemu uma ai le pasese a le vaa a le Japan Airlines, na ta’ua mai anapo e tusa ma faamaoniga mai le ofisa leoleo i Iapani, e toalima tagata sa i luga o le vaalele a le coastguard ua maliliu, ma o loo saogalemu le pailate.
O le vaa lea a le coastguard na faamoemoe e tuua le malaevaalele ma agai atu e momoli fesoasoani mo pitonuu o Iapani o loo mafatia ona o le mafuie na lulu i le Aso Gafua lea ua mautinoa ua maliliu ai le silia ma le 50 tagata ma o i latou uma nei e mai Ishikawa.
O le malaevaalele i Haneda lea na tupu ai le faalavelave o se tasi o malaevaalele pisi i Iapani ma ua aafia ai nei ma femalagaa’iga a le toatele a o iai i le faaiuga o aso fiafia.
