Mu le uta tele o lapisi recycle a o iai i luga i le taavale i Newmarket i Aukilani.
E lē o le taimi muamua lea ua mu ai tua o se loli o loo ave ai lapisi recycle, ma o le mu na tulai mai i le Aso Faraile o le vaiaso talu ai na iu ai ina toe sasaa mai i fafo le uta e tusa ma le tolu tone le mamafa a le loli, ma e faafetaia e le’i iai se isi na afaina ai.
Mai le sui o le pulega a le Waste Solutions a le Auckland Council, o loo faaopoopo pea taavale e faaleagaina le afi a o feaveaia otaota, ma o le tele lava e mafua mai i maa e iai maa o taavale poo fagu o loo iai i totonu kasa.
Ona o le feomia’i i totonu o le uta o le mafuaaga lea e tele ai ina pā pā ma tulai mai ai mu.
Ua toe faamanatu mai ai e lē tatau ona tuuina fagu nei e iai kasa poo meatotino e alu i le eletise i totonu o bin lapisi e aofia ai ma lapisi recycle.
